ప్రజా భవన్‌లో ఎల్ నినోపై సమీక్ష; కె.వి.ఎన్. రెడ్డి కీలక సూచనలు

22, Jul 2026 Achampet 176 Views

ప్రజా భవన్‌లో ఎల్ నినోపై రాష్ట్ర నిపుణుల కమిటీ సమావేశం: తెలంగాణ అగ్రికల్చర్ కమిషన్ K.V.N. రెడ్డి కీలక సూచనలు

హైదరాబాద్: హైదరాబాద్‌లోని ప్రజా భవన్‌లో తెలంగాణ రాష్ట్ర ప్రణాళికా మండలి వైస్ చైర్మన్ డా. జి. చిన్నారెడ్డి అధ్యక్షతన, డైరెక్టర్ ఆఫ్ అగ్రికల్చర్ డా. గోపి కన్వీనర్‌గా ఎల్ నినో (El Niño) పరిస్థితులు, వాటి ప్రభావం మరియు రాష్ట్ర స్థాయి కంటింజెన్సీ కార్యాచరణ ప్రణాళికపై ఉన్నత స్థాయి నిపుణుల కమిటీ సమావేశం జరిగింది.

ఈ సమావేశానికి తెలంగాణ అగ్రికల్చర్ & ఫార్మర్స్ వెల్ఫేర్ కమిషన్ తరఫున శ్రీ కె.వి.ఎన్. రెడ్డి ప్రత్యేక ఆహ్వానితులుగా (Special Invitee) హాజరై పలు కీలక సూచనలు చేశారు.

ఈ సందర్భంగా  K.V.N. రెడ్డి మాట్లాడుతూ.. ఎల్ నినో ప్రభావాన్ని అధిగమించడానికి రాష్ట్ర, జిల్లా, మండల మరియు గ్రామ స్థాయిల్లో స్థానిక పరిస్థితులకు అనుగుణంగా కంటింజెన్సీ ప్రణాళికలను రూపొందించాలని స్పష్టం చేశారు.

 K.V.N. రెడ్డి చేసిన ప్రధాన సూచనలు:

• పంటల మార్పిడి: తక్కువ నీటితో సాగయ్యే పంటలను ప్రోత్సహించాలని, రైతులకు వాతావరణ ఆధారిత సలహాలు సకాలంలో అందించాలని కోరారు.

• నీటి నిల్వ చర్యలు: వర్షపు నీటిని పొదుపు చేసేందుకు ఇంకుడు గుంటలు (Farm Ponds), చెక్‌డ్యామ్‌ల నిర్మాణాలు పెంచి భూగర్భ జలాలను పరిరక్షించాలన్నారు.

• పశుగ్రాసం & పశుసంపద రక్షణ: పశుగ్రాస ఉత్పత్తి, నిల్వ మరియు పంపిణీకి ముందస్తు చర్యలు చేపట్టాలని తెలిపారు.

• ఉద్యాన శాఖ బలోపేతం: ఉద్యానవన శాఖలో ఖాళీగా ఉన్న పోస్టులను భర్తీ చేయడంతో పాటు కొత్త నియామకాలు చేపట్టాలని, ఫీల్డ్ సిబ్బందిని పెంచి శాఖను బలోపేతం చేయాలని సూచించారు. బిందు సేద్యం (Drip), మల్చింగ్ వంటి సాంకేతికతలను విస్తృతంగా విస్తరించాలన్నారు.

• శాఖల సమన్వయం: వ్యవసాయ, ఉద్యాన, పశుసంవర్ధక, నీటిపారుదల శాఖలు మరియు వ్యవసాయ యూనివర్సిటీలు పరస్పర సమన్వయంతో పనిచేసి రైతులను ఆదుకోవాలని కోరారు.

కమిషన్ తరఫున K.V.N. రెడ్డి చేసిన ఈ ప్రతిపాదనలను సమావేశంలో పాల్గొన్న నిపుణుల కమిటీ సభ్యులు సానుకూలంగా స్వీకరించి, రాష్ట్ర స్థాయి కంటింజెన్సీ ప్రణాళికలో చేర్చుకుంటామని వెల్లడించారు.