కొండారెడ్డిపల్లి అభివృద్ధిపై కలెక్టర్ హేమంత్ కేశవ్ పాటిల్ సమీక్ష | Nagarkurnool News

30, May 2026 Achampet 176 Views

జూన్ నెలాఖరులోపు కొండారెడ్డిపల్లి అభివృద్ధి పనులు పూర్తి కావాలి: కలెక్టర్ హేమంత్ కేశవ్ పాటిల్

నాగర్ కర్నూల్/వంగూరు: ముఖ్యమంత్రి రేవంత్ రెడ్డి స్వగ్రామమైన వంగూరు మండలం కొండారెడ్డిపల్లిని ఆదర్శ గ్రామంగా తీర్చిదిద్దేందుకు ప్రభుత్వం ప్రత్యేక దృష్టి సారించిందని జిల్లా కలెక్టర్ హేమంత్ కేశవ్ పాటిల్ పేర్కొన్నారు. ఆదివారం గ్రామంలో జరుగుతున్న వివిధ శాఖల అభివృద్ధి పనుల పురోగతిపై అదనపు కలెక్టర్ దేవ సహాయం, ఆర్డీవో జనార్దన్ రెడ్డిలతో కలిసి కలెక్టర్ సమీక్షా సమావేశం నిర్వహించారు.

ఈ సందర్భంగా కలెక్టర్ మాట్లాడుతూ, గ్రామంలో జరుగుతున్న పాఠశాలలు, అంగన్‌వాడీ కేంద్రాలు, రహదారులు, డ్రైనేజీ పనులను జూన్ నెలాఖరులోపు యుద్ధ ప్రాతిపదికన పూర్తి చేయాలని అధికారులను ఆదేశించారు. ప్రాథమిక ఆరోగ్య కేంద్రం, తాగునీరు, విద్యుత్ వంటి మౌలిక వసతుల కల్పనలో ఎలాంటి జాప్యం జరగకూడదని స్పష్టం చేశారు.

నాణ్యత విషయంలో కఠిన హెచ్చరికలు: అభివృద్ధి పనుల నాణ్యత విషయంలో ఎట్టి పరిస్థితుల్లోనూ రాజీ పడే ప్రసక్తే లేదని కలెక్టర్ హెచ్చరించారు. నాసిరకం పనులు జరిగితే సంబంధిత అధికారులను బాధ్యులను చేస్తామని, ప్రతి పని నిర్దేశిత ప్రమాణాలకు అనుగుణంగా ఉండేలా నిరంతరం పర్యవేక్షించాలని ఆదేశించారు.

ప్రజలకు మెరుగైన మౌలిక వసతులు కల్పించడమే ప్రభుత్వ ప్రధాన లక్ష్యమని, శాఖల మధ్య సమన్వయం లోపించకుండా పనులను ముందుకు తీసుకెళ్లాలని సూచించారు. ఏవైనా సమస్యలు ఎదురైతే వెంటనే తన దృష్టికి తీసుకురావాలని, పనుల పురోగతిపై ప్రతిరోజూ నిఘా ఉంటుందని కలెక్టర్ వెల్లడించారు. ఈ కార్యక్రమంలో వివిధ శాఖల జిల్లా అధికారులు, మండల స్థాయి సిబ్బంది పాల్గొన్నారు.