మద్దిమడుగు ఆంజనేయ స్వామి ఆలయ ప్రాంగణంలో అగ్నిప్రమాదం.. 5 షాపులు దగ్ధం!

20, May 2026 Padara 176 Views

మద్దిమడుగు ఆంజనేయ స్వామి ఆలయ ప్రాంగణంలో భారీ అగ్నిప్రమాదం: ఐదు షాపులు పూర్తిగా దగ్ధం!

పదర (మద్దిమడుగు): నాగర్‌కర్నూల్ జిల్లా పదర మండలం మద్దిమడుగు గ్రామంలోని ప్రసిద్ధ పుణ్యక్షేత్రం శ్రీ పబ్బతి ఆంజనేయ స్వామి ఆలయ ప్రాంగణంలో అర్ధరాత్రి వేళ భారీ అగ్నిప్రమాదం సంభవించింది. ప్రమాదవశాత్తు విద్యుత్ షార్ట్ సర్క్యూట్ (Short Circuit) సంభవించడంతో ఒక్కసారిగా మంటలు చెలరేగి, ఆలయ పరిసరాల్లో ఉన్న ఐదు దుకాణాలు (షాపులు) పూర్తిగా బూడిదయ్యాయి. ఈ ఘటనలో వ్యాపారులకు భారీగా ఆస్తి నష్టం వాటిల్లింది.

స్థానికులు తెలిపిన వివరాల ప్రకారం.. అర్ధరాత్రి సమయంలో ఒక షాపులో మొదలైన మంటలు క్షణాల వ్యవధిలోనే పక్కనే ఉన్న పూజా సాగగ్రి, కొబ్బరికాయలు మరియు ప్రసాదం విక్రయించే ఇతర దుకాణాలకు వేగంగా విస్తరించాయి. అర్ధరాత్రి కావడం, మంటల తీవ్రత ఎక్కువగా ఉండటంతో స్థానికులు అప్రమత్తమై మంటలను అదుపు చేయడానికి ప్రయత్నించినప్పటికీ ఫలితం లేకుండా పోయింది. చూస్తుండగానే ఐదు షాపులు సామాగ్రితో సహా పూర్తిగా కాలిబూడిదయ్యాయి.

ఈ ప్రమాదంలో దుకాణాల్లో ఉన్న నగదు, విలువైన పూజా సాగగ్రి, ఫర్నిచర్ అంతా కాలిపోవడంతో ఆయా పేద వ్యాపార కుటుంబాలు రోడ్డున పడ్డాయి. బాధితులు లక్షల్లో ఆస్తి నష్టం వాటిల్లిందని కన్నీరుమున్నీరవుతున్నారు. సమాచారం అందుకున్న పోలీసులు మరియు ఆలయ అధికారులు ఘటనా స్థలానికి చేరుకుని ప్రమాదానికి గల కారణాలపై దర్యాప్తు జరుపుతున్నారు. ప్రభుత్వం మరియు దేవస్థానం కమిటీ స్పందించి తక్షణమే తమను ఆదుకోవాలని, నష్టపరిహారం అందించి న్యాయం చేయాలని బాధిత వ్యాపారులు వేడుకుంటున్నారు.