ప్రజావాణిలో కలెక్టర్ హేమంత్ కేశవ్ పాటిల్‌కు బిఎస్పీ వినతిపత్రం | Nagarkurnool News

13, Jul 2026 Achampet 176 Views

నాగర్‌కర్నూల్ జిల్లా కలెక్టర్‌కు బిఎస్పీ వినతి: వివిధ ప్రజా సమస్యలపై వినతిపత్రం సమర్పణ

నాగర్‌కర్నూల్: జిల్లా కేంద్రంలో నిర్వహించిన ప్రజావాణి కార్యక్రమంలో బహుజన్ సమాజ్ పార్టీ (BSP) నాయకులు జిల్లా కలెక్టర్ హేమంత్ కేశవ్ పాటిల్‌ను కలిసి పలు ప్రజా సమస్యలపై వినతిపత్రం సమర్పించారు. ఈ సందర్భంగా బిఎస్పీ రాష్ట్ర ప్రధాన కార్యదర్శి పృథ్వీరాజ్ మాట్లాడుతూ.. గ్రామీణ ప్రాంతాల్లో అత్యధిక శాతం ఓటర్లు నిరక్షరాస్యులు కావడం, ఫారాలు నింపడానికి ఇతరులపై ఆధారపడటం వల్ల ఓటరు సవరణ (SIR) గడువును పొడిగించాలని రాష్ట్ర ఎన్నికల కమిషన్‌ను కలెక్టర్ ద్వారా కోరారు. 2002 ఓటర్ లిస్ట్ అందుబాటులో లేకపోవడం, ప్రజల వలసలు, ఉద్యోగులపై ఒత్తిడి కారణంగా ఈ నెల 24తో ముగిసే గడువును పొడిగించకపోతే చాలామంది ఓటు హక్కు కోల్పోయే ప్రమాదం ఉందని ఆందోళన వ్యక్తం చేశారు.

అలాగే, నాగర్‌కర్నూల్ మెయిన్ రోడ్డులోని TNGO's భవనం పక్కన ఉన్న నిషేధిత ప్రభుత్వ స్థలంలో ప్రైవేట్ వ్యక్తులు అనధికారికంగా చేపడుతున్న అక్రమ నిర్మాణాలపై విచారణ జరిపి బాధ్యులపై కఠిన చర్యలు తీసుకోవాలని డిమాండ్ చేశారు. ప్రభుత్వ ఆస్తులు అన్యాక్రాంతం కాకుండా చూడాలన్నారు.

మరికొన్ని ముఖ్యమైన డిమాండ్లు:

• 108 సిబ్బందికి వసతి: 24/7 అత్యవసర సేవలు అందించే 108 సిబ్బందికి గతంలో MPDO కార్యాలయంలో రూం ఉండేదని, ప్రస్తుతం అది లేక ఇబ్బందులు పడుతున్నందున మానవతా దృక్పథంతో వారికి జిల్లా కేంద్రంలో ఒక రూం కేటాయించాలి.

• విద్యాశాఖపై సమీక్ష: అమ్రాబాద్ ఆశ్రమ పాఠశాలలో ఇటీవల 27 మంది విద్యార్థులకు ఫుడ్ పాయిజన్ అయిందని, గతంలోనూ ఇలాంటి ఘటనలు జరిగాయని గుర్తు చేస్తూ.. అన్ని సంక్షేమ శాఖల (SC, ST, OBC, మైనారిటీ) అధికారులు, వార్డెన్లు, గురుకులాల ప్రిన్సిపాల్స్‌తో కలెక్టర్ పూర్తి స్థాయి సమీక్ష సమావేశం నిర్వహించాలి.

• KGBV సిబ్బంది బదిలీలు: జిల్లాలోని కస్తూరిబా గాంధీ బాలికా విద్యాలయాల (KGBV) SOలు ఒకే చోట 10 సంవత్సరాలకు పైగా పని చేస్తూ విధుల్లో నిర్లక్ష్యం వహిస్తున్నారని, కాబట్టి SOలు మరియు సిబ్బందికి జిల్లా లేదా డివిజన్ స్థాయిలో బదిలీలు చేపట్టాలని కోరారు.

ఈ కార్యక్రమంలో బిఎస్పీ పార్లమెంట్ ఇంచార్జ్ సి.కళ్యాణ్, జిల్లా కార్యదర్శి బి.దాస్, పార్టీ నాయకులు కాకునూరి మధు, నాగరాజ్, బాలరాజు, బీవీఎఫ్ అసెంబ్లీ కన్వీనర్ రమేష్ తదితరులు పాల్గొన్నారు.