బల్మూరు: కొండనాగుల మొక్కజొన్న కొనుగోలు కేంద్రంలో సీపీఎం, రైతు సంఘం ఆందోళన

23, May 2026 Balmoor 176 Views

కొండనాగులలో నెల రోజులుగా మొక్కజొన్న రైతుల పడిగాపులు.. తక్షణమే కొనాలంటూ సీపీఎం, రైతు సంఘం డిమాండ్!

బల్మూరు: నాగర్‌కర్నూలు జిల్లా బల్మూరు మండలంలోని కొండనాగుల గ్రామంలో ఏర్పాటు చేసిన మొక్కజొన్న కొనుగోలు కేంద్రాన్ని సీపీఎం పార్టీ, రైతు సంఘం జిల్లా నాయకులు ఆదివారం సంయుక్తంగా సందర్శించారు. ఈ సందర్భంగా కొనుగోలు కేంద్రంలో రోజుల తరబడి నిలిచిపోయిన మొక్కజొన్న కుప్పలను పరిశీలించి, అక్కడే పడిగాపులు కాస్తున్న అన్నదాతలతో మాట్లాడి వారి సమస్యలను అడిగి తెలుసుకున్నారు.

అనంతరం సీపీఎం మండల కార్యదర్శి శంకర్ నాయక్, రైతు సంఘం జిల్లా నాయకులు శ్రావణ్ కుమార్ సంయుక్తంగా మీడియాతో మాట్లాడారు. కేంద్ర, రాష్ట్ర ప్రభుత్వాలు రైతాంగ సంక్షేమాన్ని పూర్తిగా గాలికొదిలేశాయని మండిపడ్డారు. కొనుగోలు కేంద్రానికి రైతులు మొక్కజొన్నలు తీసుకువచ్చి నెల రోజులు గడుస్తున్నా.. వాటిని కొనుగోలు చేసి, రవాణా (ట్రాన్స్‌పోర్ట్) చేసే నాథుడే కరువయ్యాడని ఆవేదన వ్యక్తం చేశారు. కాంటాలు వేసి సంచుల్లో నింపిన ధాన్యాన్ని లారీలు లేక అక్కడే వదిలేశారని, దాంతో రైతులు రాత్రింబవళ్లు పంటకు కావలి ఉంటూ నానా అవస్థలు పడుతున్నారని ధ్వజమెత్తారు.

మరోవైపు వర్షాకాలం ప్రారంభమవుతున్నా మొక్కజొన్న కొనుగోళ్లు పూర్తి కాలేదని, వరి పండించిన రైతులు వడ్లను ఎక్కడికి తీసుకెళ్లాలో తెలియక పొలాల్లో, కల్లాల వద్దే వేసుకొని దీనంగా ఎదురుచూస్తున్నారని వారు గుర్తు చేశారు. ఇప్పటికైనా రాష్ట్ర ప్రభుత్వం తక్షణమే జోక్యం చేసుకొని, యుద్ధప్రాతిపదికన గన్నీ బ్యాగులను, ప్రైవేట్ లారీలను ఏర్పాటు చేసి ధాన్యాన్ని తరలించాలని డిమాండ్ చేశారు. రైతుల గోస పట్టించుకోని పాలకులకు మనుగడ ఉండదని, ప్రభుత్వం ఇప్పటికైనా నిర్లక్ష్యం వీడకపోతే అన్నదాతల ఆధ్వర్యంలో పెద్ద ఎత్తున ఆందోళనలు, పోరాటాలు నిర్వహిస్తామని హెచ్చరించారు.

ఈ కార్యక్రమంలో సీపీఎం పార్టీ మండల నాయకులు ఎండి లాల్ మొహమ్మద్, ఆంజనేయులు, మహేందర్, శ్రావణ్ కుమార్ మరియు పెద్ద సంఖ్యలో స్థానిక రైతులు పాల్గొన్నారు.