అచ్చంపేట ఎన్టీఆర్ స్టేడియం అభివృద్ధికి రూ. 10 కోట్లు - ఎమ్మెల్యే వంశీకృష్ణ

11, Jan 2026 Achampet 176 Views

అచ్చంపేట క్రీడాకారులు జాతీయ స్థాయిలో రాణించాలి: ఎమ్మెల్యే డాక్టర్ చిక్కుడు వంశీకృష్ణ

- రూ. 10 కోట్లతో ఎన్టీఆర్ స్టేడియం అభివృద్ధి పనులు - ముగిసిన అచ్చంపేట టెన్నిస్ బాల్ ప్రీమియర్ లీగ్ - విజేతలకు బహుమతుల ప్రదానం

అచ్చంపేట: నల్లమల ప్రాంత క్రీడాకారులు తమ ప్రతిభతో జాతీయ స్థాయిలో రాణించాలని అచ్చంపేట శాసనసభ్యులు డాక్టర్ చిక్కుడు వంశీకృష్ణ ఆకాంక్షించారు. అచ్చంపేట పట్టణంలోని ఎన్టీఆర్ స్టేడియంలో గత వారం రోజులుగా నిర్వహిస్తున్న "అచ్చంపేట టెన్నిస్ బాల్ ప్రీమియర్ లీగ్" క్రికెట్ టోర్నమెంట్ ముగింపు వేడుకలకు ఆయన ముఖ్య అతిథిగా హాజరై, విజేతలకు బహుమతులు ప్రధానం చేశారు.

స్టేడియం అభివృద్ధికి రూ. 10 కోట్లు: ఈ సందర్భంగా ఎమ్మెల్యే మాట్లాడుతూ.. క్రీడల పట్ల యువతకు ఉన్న ఆసక్తిని ప్రోత్సహించేందుకు అచ్చంపేటలోని రాజీవ్ - ఎన్టీఆర్ స్టేడియాన్ని అన్ని రకాల హంగులతో తీర్చిదిద్దుతున్నామని తెలిపారు. స్టేడియం అభివృద్ధి కోసం 10 కోట్ల రూపాయలతో పనులు ప్రారంభించబోతున్నామని, క్రీడాకారులకు అధునాతన వసతులు కల్పిస్తామని హామీ ఇచ్చారు. త్వరలోనే అచ్చంపేటలో "ఆల్ ఇండియా క్రికెట్ టోర్నమెంట్" నిర్వహించనున్నట్లు ప్రకటించారు.

బహుమతుల ప్రదానం: టోర్నమెంట్లో ప్రతిభ కనబరిచి ప్రథమ, ద్వితీయ, తృతీయ స్థానాల్లో నిలిచిన జట్లకు ఎమ్మెల్యే బహుమతులు అందజేశారు. ఈ కార్యక్రమంలో జిల్లా గ్రంథాలయ సంస్థ చైర్మన్ రాజేందర్, మున్సిపల్ చైర్మన్ గార్లపాటి శ్రీనివాసులు, మాజీ ఎంపీపీ రామనాథం, ఎస్సై సద్దాం, కౌన్సిలర్ శివ, ముత్యాల లాలు యాదవ్, లక్ష్మణ్ బాబు, టోర్నమెంట్ నిర్వాహకులు, స్పాన్సర్స్ మరియు క్రీడా అభిమానులు పాల్గొన్నారు.