అచ్చంపేటలో విషాదం.. మూడు రోజులుగా అదృశ్యమైన వ్యక్తి క్వారీలో శవమై లభ్యం!

18, Jul 2026 Achampet 176 Views

అచ్చంపేటలో విషాదం: మూడు రోజులుగా అదృశ్యమైన వ్యక్తి క్వారీలో శవమై లభ్యం!

అచ్చంపేట (నాగర్ కర్నూల్): నాగర్ కర్నూల్ జిల్లా అచ్చంపేట మండల పరిధిలో విషాదకర ఘటన చోటుచేసుకుంది. గత మూడు రోజులుగా కనిపించకుండా పోయిన ఓ వ్యక్తి.. క్వారీలో మృతదేహంగా లభ్యమయ్యాడు. పోలీసులు చాకచక్యంగా మృతదేహంపై ఉన్న ఆనవాళ్ల ఆధారంగా అతడిని గుర్తించి, చట్టపరమైన ప్రక్రియల అనంతరం కుటుంబ సభ్యులకు అప్పగించారు.

పోలీసుల వివరాల ప్రకారం.. పీఎన్ లక్ష్మాపూర్ గ్రామానికి చెందిన వరిగె బాలస్వామి (47) వృత్తిరీత్యా కూలీగా పనిచేస్తూ జీవనం సాగిస్తున్నాడు. ఆయనకు ఇద్దరు భార్యలు, నలుగురు పిల్లలు ఉన్నారు. కాగా, గత మూడు రోజులుగా బాలస్వామి ఇంటికి రాకపోవడంతో కుటుంబ సభ్యులు పోలీసులకు ఫిర్యాదు చేశారు. ఈ క్రమంలో అచ్చంపేట మండలం నడింపల్లి గ్రామ శివారులోని ఓ క్వారీ ప్రాంతం నుంచి తీవ్రమైన దుర్వాసన వస్తుండటాన్ని పొలాలకు వెళ్లిన స్థానిక గ్రామస్థులు గమనించారు. అనుమానం వచ్చి క్వారీలో చూడగా కుళ్ళిన స్థితిలో మృతదేహం కనిపించడంతో వెంటనే అచ్చంపేట పోలీసులకు సమాచారం అందించారు.

సమాచారం అందుకున్న అచ్చంపేట ఎస్సై నరేష్ తన సిబ్బందితో కలిసి వెంటనే సంఘటనా స్థలానికి చేరుకుని పరిశీలించారు. మృతదేహంపై ఉన్న ఆనవాళ్లను నిశితంగా పరిశీలించగా.. మూడు రోజుల క్రితం నమోదైన అదృశ్య కేసు (మిస్సింగ్ కేసు) వివరాలతో పోలికలు ఉన్నట్లు గుర్తించారు. వెంటనే బాలస్వామి కుటుంబ సభ్యులను అక్కడికి పిలిపించగా, వారు ఆ మృతదేహాన్ని బాలస్వామిదిగా ధృవీకరించారు. అనంతరం పోలీసులు పంచనామా నిర్వహించి, చట్టపరమైన ప్రక్రియలు పూర్తి చేశారు. పోస్టుమార్టం అనంతరం మృతదేహాన్ని కుటుంబ సభ్యులకు అప్పగించినట్లు ఎస్సై నరేష్ తెలిపారు. కేసు నమోదు చేసుకుని దర్యాప్తు చేస్తున్నట్లు పోలీసులు పేర్కొన్నారు.