అచ్చంపేట మారుతి నగర్‌లో 'వార్డు సభ': పచ్చదనం-పరిశుభ్రతపై కమిషనర్ మురళి కీలక దిశా నిర్దేశం!

06, Jun 2026 Achampet 176 Views

మారుతి నగర్‌లో మున్సిపల్ ‘వార్డు సభ’.. పచ్చదనం-పరిశుభ్రతే లక్ష్యం: కమిషనర్ మురళి

అచ్చంపేట: పట్టణాల ప్రగతి వార్డుల నుంచే ప్రారంభం కావాలనే సంకల్పంతో అచ్చంపేట మున్సిపాలిటీలో వార్డు సభలు జోరందుకున్నాయి. అచ్చంపేట పట్టణంలోని మారుతి నగర్ పరిధిలో గల 12 మరియు 20వ వార్డులలో శనివారం మున్సిపల్ కమిషనర్ మురళి ఆధ్వర్యంలో ప్రత్యేక "వార్డు సభ" నిర్వహించారు. డీసీసీ అధ్యక్షులు, స్థానిక శాసనసభ్యులు డాక్టర్ చిక్కుడు వంశీకృష్ణ ఆదేశాల మేరకు వార్డుల్లోని సమస్యల పరిష్కారం, మౌలిక వసతుల కల్పనే ధ్యేయంగా ఈ సభ జరిగింది.

మూడు ముఖ్య సూత్రాలపై అవగాహన

ఈ వార్డు సభలో మున్సిపల్ కమిషనర్ మురళి స్థానిక ప్రజలను ఉద్దేశించి మాట్లాడుతూ, ప్రతి ఇల్లాలు, ప్రతి పౌరుడు పట్టణ పరిశుభ్రతలో భాగస్వాములు కావాలని పిలుపునిచ్చారు. సభలో ప్రధానంగా మూడు అంశాలపై విస్తృతంగా చర్చించారు:

• పచ్చదనం - పరిశుభ్రత: పరిసరాలను పరిశుభ్రంగా ఉంచుకోవడం ద్వారా వ్యాధులను అరికట్టవచ్చని, ఇండ్ల ముందర మొక్కలు నాటి పచ్చదనాన్ని పెంపొందించాలని కోరారు.

• నీటి సంరక్షణ - ఇంకుడు గుంతలు: వర్షపు నీరు వృథా కాకుండా భూగర్భ జలాలు పెరిగేలా ప్రతి ఇంటి పరిధిలో తప్పనిసరిగా ఇంకుడు గుంతలను (Soak pits) ఏర్పాటు చేసుకోవాలని సూచించారు.

• ఘన వ్యర్థాల నివారణ: తడి చెత్త, పొడి చెత్తను వేరువేరుగా మున్సిపల్ వాహనాలకు అందించాలని, ప్లాస్టిక్ వాడకాన్ని తగ్గించాలని స్పష్టం చేశారు.

ఎమ్మెల్యే డాక్టర్ చిక్కుడు వంశీకృష్ణ మార్గదర్శకత్వంలో అచ్చంపేటను ఆదర్శ మున్సిపాలిటీగా తీర్చిదిద్దడమే మా లక్ష్యం. వార్డుల్లోని డ్రైనేజీ, సిసి రోడ్లు, తాగునీటి సమస్యలను నేరుగా ప్రజల నుంచి సేకరించి, వాటి పరిష్కారానికి ప్రణాళికలు సిద్ధం చేస్తున్నాం. — మురళి, మున్సిపల్ కమిషనర్

ప్రజాప్రతినిధులు, నాయకుల భాగస్వామ్యం

ఈ కార్యక్రమంలో కాంగ్రెస్ పట్టణ అధ్యక్షుడు ఖాదర్ పాషా మాట్లాడుతూ.. ప్రజా ప్రభుత్వం ప్రజల వద్దకే వచ్చి సమస్యలను తెలుసుకుంటుందని, వార్డు సభల ద్వారా స్థానిక సమస్యలకు త్వరలోనే మోక్షం లభిస్తుందని నమ్మకం వ్యక్తం చేశారు.

ఈ వార్డు సభలో 20వ వార్డు మాజీ కౌన్సిలర్ రమేష్ రావు, 12వ వార్డు మాజీ కౌన్సిలర్ ఖాజాబీ, 20వ వార్డు ఇన్‌ఛార్జ్ లక్ష్మణ్ బాబు, కో-ఆప్షన్ మెంబర్ షమీం, వార్డ్ ఆఫీసర్లు గణేష్, కావ్యలతో పాటు స్థానిక కాంగ్రెస్ పార్టీ కార్యకర్తలు, మున్సిపల్ సిబ్బంది మరియు వార్డు ప్రజలు పెద్ద సంఖ్యలో పాల్గొన్నారు.