మూసేసిన 14 పాఠశాలలను తెరిపించాలి; అచ్చంపేట ఆర్డీవో ఆఫీస్ వద్ద సీపీఎం ధర్నా

21, Jul 2026 Achampet 176 Views

సంక్షోభంలో విద్యారంగం.. మూసివేసిన 14 పాఠశాలలను వెంటనే తెరిపించాలి: సీపీఎం మండల కార్యదర్శి వర్ధం సైదులు

అచ్చంపేట:

తెలంగాణలో ప్రభుత్వ విద్యా వ్యవస్థ తీవ్ర సంక్షోభంలో కూరుకుపోయిందని, బడుగు, బలహీన వర్గాలు మరియు గిరిజన, ఆదివాసీ విద్యార్థులకు విద్య అందని ద్రాక్షలా మారిందని భారత కమ్యూనిస్టు పార్టీ (మార్క్సిస్ట్) అచ్చంపేట మండల కార్యదర్శి వర్ధం సైదులు తీవ్ర ఆందోళన వ్యక్తం చేశారు. ప్రభుత్వ విద్యారంగంలోని సమస్యలను వెంటనే పరిష్కరించాలని డిమాండ్ చేస్తూ సీపీఎం ఆధ్వర్యంలో అచ్చంపేట ఆర్డీవో (RDO) కార్యాలయం ఎదుట ధర్నా నిర్వహించి, అనంతరం డిప్యూటీ తహశీల్దార్ (DT) నజీర్‌కు వినతిపత్రం సమర్పించారు.

ఈ సందర్భంగా వర్ధం సైదులు మాట్లాడుతూ.. అచ్చంపేట మండలంలో నక్కెర్లపెంట, దర్శన్‌గడ్డ, వంకమూతి తండా, పెద్దవాగు తండా, కుర్ర తండా, కేశవ తండా, దుబ్బ తండా, మార్లబాండ్ తండా తదితర గిరిజన తండాల్లోని మొత్తం 14 పాఠశాలలను పూర్తిస్థాయిలో మూసివేయడం పట్ల ఆవేదన వ్యక్తం చేశారు. ఒకపక్క ప్రభుత్వ పాఠశాలలను బలోపేతం చేస్తామని చెబుతూనే, మరోపక్క ఎస్సీ, ఎస్టీ, బీసీ, మైనార్టీ విద్యార్థులకు విద్యను దూరం చేసేలా బడులను మూసివేస్తున్నారని కాంగ్రెస్ ప్రభుత్వంపై విమర్శలు గుప్పించారు.

ఉపాధ్యాయుల డిప్యూటేషన్లను తక్షణమే రద్దు చేసి, ఖాళీగా ఉన్న టీచర్ పోస్టులను భర్తీ చేయాలని ఆయన డిమాండ్ చేశారు. దెబ్బతిన్న పాఠశాల భవనాలకు మరమ్మతులు చేపట్టి మౌలిక వసతులు కల్పించాలని, విద్యార్థులకు మెనూ ప్రకారం నాణ్యమైన భోజనం అందించాలని కోరారు. ప్రభుత్వం తన వైఖరిని మార్చుకుని ప్రభుత్వ విద్యా రంగాన్ని కాపాడకపోతే సీపీఎం ఆధ్వర్యంలో పెద్ద ఎత్తున ఆందోళనలు చేపడతామని హెచ్చరించారు. ఈ కార్యక్రమంలో సీపీఎం టౌన్ సెక్రటరీ రాములు, నాయకులు చరణ్, లక్ష్మణ్, ఇస్సాక్, మల్లేష్, గోపాల్ తదితరులు పాల్గొన్నారు.