ఉప్పునుంతల: కంకర రోడ్డుతో తిప్పాపూర్ తండా వాసుల అవస్థలు | BT Road Pending

24, May 2026 Achampet 176 Views

నరకప్రాయంగా ‘తిప్పాపూర్ తండా’ ప్రయాణం: ఏడాదిగా తేలిన కంకర రోడ్డు.. కాంట్రాక్టర్ నిర్లక్ష్యంపై జనం ఆగ్రహం!

ఉప్పునుంతల: నాగర్‌కర్నూలు జిల్లా ఉప్పునుంతల మండల పరిధిలోని తిప్పాపూర్ తండా గ్రామస్థులు, వాహనదారులు కంకర రోడ్డు కారణంగా గత కొంతకాలంగా తీవ్ర నరకాన్ని అనుభవిస్తున్నారు. తిప్పాపూర్ తండా నుంచి కాంసానిపల్లి తండాకు వెళ్లే ప్రధాన రహదారి పనులు మధ్యలోనే నిలిచిపోవడంతో రాకపోకలకు తీవ్ర అంతరాయం కలుగుతోందని స్థానికులు ఆవేదన వ్యక్తం చేస్తున్నారు.

గ్రామస్థులు తెలిపిన వివరాల ప్రకారం.. సుమారు సంవత్సరం క్రితం సదరు మార్గంలో బీటీ రోడ్డు నిర్మాణ పనుల కోసం కాంట్రాక్టర్ కంకర పరిచారు. అయితే, ఆ తర్వాత పనులను పూర్తిగా గాలికొదిలేశారు. కంకర వేసి ఏడాది గడుస్తున్నా ఇంతవరకు బీటీ రోడ్డు వేయకపోవడంతో, ప్రస్తుతం కంకర అంతా పైకి తేలిపోయింది. దీనివల్ల ద్విచక్ర వాహనాలపై వెళ్లే వారు అదుపుతప్పి కిందపడిపోతున్నారు. వాహనాల టైర్లు పగిలిపోవడమే కాకుండా, నడుచుకుంటూ వెళ్లే కాలినడక ప్రయాణికులు, వృద్ధులు సైతం కాళ్లకు గాయాలవుతున్నాయని వాపోతున్నారు.

ముఖ్యంగా రాత్రి సమయాల్లో కరెక్ట్ లైటింగ్ లేకపోవడం, రోడ్డుపై పెద్ద పెద్ద కంకర రాళ్లు తేలి ఉండటంతో ప్రయాణం చేయడం ప్రాణాలతో చెలగాటంగా మారిందని వాహనదారులు భయాందోళన వ్యక్తం చేస్తున్నారు. బీటీ రోడ్డు నిర్మాణ పనులు నత్తనడకన సాగుతున్నాయే తప్ప పూర్తి చేయడం లేదని తిప్పాపూర్ తండా, కాంసానిపల్లి తండాతో పాటు మరో గ్రామానికి చెందిన ప్రజలు తీవ్ర ఆగ్రహం వ్యక్తం చేస్తున్నారు. వర్షాకాలం ముంచుకొస్తున్న నేపథ్యంలో ఇప్పటికైనా సంబంధిత పై అధికారులు తక్షణమే స్పందించి, పెండింగ్‌లో ఉన్న ఈ బీటీ రోడ్డు పనులను యుద్ధప్రాతిపదికన పూర్తి చేయాలని, లేనిపక్షంలో పెద్ద ఎత్తున ప్రమాదాలు జరిగే అవకాశం ఉందని స్థానికులు హెచ్చరిస్తున్నారు.