భారత జనగణన బీసీలకు శాపంగా మారింది: బి సి ఎఫ్ స్టేట్ సెక్రటరీ డాక్టర్ నరేష్ యాదవ్

27, Apr 2026 Achampet 176 Views

జనగణనలో బీసీలకు ‘కాలం’ ఏది? కుల గణన చేయకపోవడం బీసీలకు శాపం: డాక్టర్ నారమోని నరేష్ యాదవ్

అచ్చంపేట/హైదరాబాద్: దేశవ్యాప్తంగా జరుగుతున్న జనగణన ప్రక్రియలో బీసీలకు ప్రత్యేక కాలం (Column) కేటాయించకపోవడం పట్ల బీసీఎఫ్ (BCF) స్టేట్ సెక్రటరీ, యాదవ జేఏసీ రాష్ట్ర యువ అధ్యక్షులు డాక్టర్ నారమోని నరేష్ యాదవ్ తీవ్ర ఆగ్రహం వ్యక్తం చేశారు. భారతదేశ జనగణన బీసీల పాలిట శాపంగా మారిందని ఆయన విమర్శించారు.

ఎన్నికల స్టంట్‌గా బీసీల అంశం: ఎస్సీ, ఎస్టీలకు జనగణనలో ప్రత్యేక కాలం ఇచ్చిన ప్రభుత్వం, బీసీల విషయంలో ఎందుకు నిర్లక్ష్యం వహిస్తోందని ఆయన ప్రశ్నించారు. కేవలం ఎన్నికల సమయంలోనే బీసీల జపం చేసే పార్టీలు, కుల గణన విషయంలో వెనకడుగు వేయడం వారి కపట ప్రేమకు నిదర్శనమన్నారు. "62 శాతం ఉన్న బీసీలు తమ హక్కుల కోసం ధర్నాలు, ఆకలి చావులకు గురవుతుంటే, కేవలం 4 శాతం ఉన్న అగ్రవర్ణాలకు 10 శాతం ఈడబ్ల్యూఎస్ (EWS) రిజర్వేషన్లు కల్పించడం ఏ రకమైన న్యాయం?" అని ఆయన నిలదీశారు.

గొర్రెలు, బర్రెలతోనే సరిపెడతారా?: బీసీలను కేవలం ఓటు బ్యాంకుగా మాత్రమే వాడుకుంటున్నారని, ఇంకా ఎంతకాలం గొర్రెలు, బర్రెలు, చేపలు, కుట్టు మిషన్లతో బీసీల గొంతు నొక్కుతారని నరేష్ యాదవ్ మండిపడ్డారు. విద్యా, ఉద్యోగ, రాజకీయ రంగాల్లో జనాభా దమాషా ప్రకారం బీసీలకు సమచిత స్థానం దక్కాలని డిమాండ్ చేశారు. బీసీ ప్రధానమంత్రి అని చెప్పుకుంటున్న నరేంద్ర మోడీ గారు వెంటనే స్పందించి, జనగణనలో కుల గణన అంశాన్ని చేర్చాలని కోరారు. బీసీ ప్రజలారా మేల్కొనండి.. ప్రశ్నించే గొంతుకలకు తోడవ్వండి.. రాజ్యాధికారం దిశగా అడుగులు వేయండి అంటూ ఆయన పిలుపునిచ్చారు.