నీట్ లీకేజీ, రాహుల్ అరెస్ట్‌కు నిరసన; లింగాలలో మోదీ, అమిత్ షా దిష్టిబొమ్మల దహనం

23, Jul 2026 Lingal 176 Views

యువత, విద్యార్థుల భవిష్యత్తుతో చెలగాటమాడుతున్న మోదీ ప్రభుత్వానికి బుద్ధి చెప్పాలి: లింగాలలో కాంగ్రెస్ నిరసన

లింగాల: నీట్ (NEET) ప్రశ్నపత్రాల లీకేజీ అక్రమాలకు బాధ్యత వహిస్తూ కేంద్ర విద్యాశాఖ మంత్రి ధర్మేంద్ర ప్రధాన్ తక్షణమే రాజీనామా చేయాలని, విద్యార్థుల హక్కుల కోసం పోరాడుతున్న లోక్‌సభ ప్రతిపక్ష నేత రాహుల్ గాంధీని అక్రమంగా అరెస్టు చేయడాన్ని నిరసిస్తూ లింగాల మండల కేంద్రంలో కాంగ్రెస్ శ్రేణులు నిరసన హోరెత్తించాయి. అచ్చంపేట ఎమ్మెల్యే డాక్టర్ చిక్కుడు వంశీకృష్ణ మరియు నాయకులు రంగినేని శ్రీనివాసరావు ఆదేశాల మేరకు పట్టణ సర్పంచ్ పూజారి ఈశ్వరమ్మ బుడ్డయ్య ఆధ్వర్యంలో ప్రధాని నరేంద్ర మోదీ, కేంద్ర హోం మంత్రి అమిత్ షా, కేంద్ర విద్యాశాఖ మంత్రి ధర్మేంద్ర ప్రధాన్‌ల దిష్టిబొమ్మలను దహనం చేశారు.

ఈ సందర్భంగా కాంగ్రెస్ మండల పార్టీ అధ్యక్షుడు నారాయణ గౌడ్ మాట్లాడుతూ.. దేశానికి వెన్నుముక లాంటి విద్యార్థులు, నిరుద్యోగ యువత తమ న్యాయమైన హక్కుల కోసం ఢిల్లీ వీధుల్లో ప్రశాంతంగా నిరసన తెలుపుతుంటే మోదీ ప్రభుత్వం వారిపై పోలీసులతో అమానుషంగా లాఠీఛార్జ్ చేయించిందని మండిపడ్డారు. ప్రజాస్వామ్యాన్ని కాపాడేందుకు పోరాడుతున్న తమ ప్రియతమ నాయకుడు రాహుల్ గాంధీని అక్రమంగా అరెస్టు చేయడం అహంకారపూరిత చర్య అని, దీనిని అచ్చంపేట నియోజకవర్గం తరఫున తీవ్రంగా ఖండిస్తున్నామని అన్నారు.

గతంలో UPA కాంగ్రెస్ హయాంలో ఐఐటీలు, ఐఐఎంలు, కేంద్రీయ విద్యాలయాలు ఏర్పడి లక్షలాది ఉద్యోగాలు వచ్చాయని, నాటి పారదర్శక వ్యవస్థ నేడు మోదీ పాలనలో వ్యాపారంగా మారిపోయిందని ధ్వజమెత్తారు. విద్యార్థులకు న్యాయం జరిగే వరకు, బాధ్యులపై చర్యలు తీసుకునే వరకు అచ్చంపేట గడ్డ నుంచి ఢిల్లీ వరకు తమ నిరసన గళం వినిపిస్తూనే ఉంటామని స్పష్టం చేశారు. ఈ కార్యక్రమంలో మండల మరియు స్థానిక కాంగ్రెస్ నాయకులు, కార్యకర్తలు పాల్గొన్నారు.