247 మంది నర్సింగ్ ఆఫీసర్లకు నియామక పత్రాలు అందజేసిన డిప్యూటీ సీఎం భట్టి విక్రమార్క

17, Jul 2026 Achampet 176 Views

నూతన నర్సింగ్ ఆఫీసర్లకు నియామక పత్రాలు అందజేసిన డిప్యూటీ సీఎం మల్లు భట్టి విక్రమార్క

హైదరాబాద్: ఇన్సూరెన్స్ మెడికల్ సర్వీసెస్ డిపార్ట్మెంట్ (IMS) ఆధ్వర్యంలో నూతనంగా ఎంపికైన 247 మంది నర్సింగ్ ఆఫీసర్లకు హైదరాబాద్‌లోని సేవాలాల్ భవన్‌లో నియామక పత్రాల అందజేత కార్యక్రమం ఘనంగా జరిగింది. ఈ కార్యక్రమానికి రాష్ట్ర ఉప ముఖ్యమంత్రి మల్లు భట్టి విక్రమార్క ముఖ్య అతిథిగా హాజరై అభ్యర్థులకు నియామక పత్రాలను అందజేశారు. ఈ వేడుకలో కార్మిక శాఖ మంత్రి గడ్డం వివేక్ వెంకటస్వామి కూడా పాల్గొన్నారు.

ఈ సందర్భంగా డిప్యూటీ సీఎం భట్టి విక్రమార్క మాట్లాడుతూ.. వైద్యం, విద్యారంగాలపై ప్రభుత్వం చేసే ఖర్చు ఉచిత సంక్షేమం కాదని, అది రాష్ట్ర భవిష్యత్తును మార్చే మానవ వనరులపై పెట్టే దీర్ఘకాలిక పెట్టుబడి అని స్పష్టం చేశారు. ఆరోగ్యవంతమైన, విద్యావంతమైన సమాజమే బలమైన ఆర్థిక వ్యవస్థకు పునాది అని ఆయన అభివర్ణించారు. ప్రజా ప్రభుత్వం అధికారంలోకి వచ్చిన తర్వాత అత్యంత పారదర్శక విధానంలో రికార్డు స్థాయిలో 76 వేల ప్రభుత్వ ఉద్యోగాలను భర్తీ చేసి యువతకు భరోసా కల్పించామని గుర్తుచేశారు.

రాష్ట్రవ్యాప్తంగా సూపర్ స్పెషాలిటీ ఆసుపత్రులు, మెడికల్, నర్సింగ్, పారామెడికల్ కాలేజీలను విస్తరిస్తూ వైద్య రంగాన్ని బలోపేతం చేస్తున్నామని ఉప ముఖ్యమంత్రి తెలిపారు. ముఖ్యంగా కార్మికులు, వారి కుటుంబాలకు మెరుగైన ఉచిత వైద్యం అందించేందుకు ఈఎస్ఐ (ESI) ఆసుపత్రులను అత్యాధునిక వైద్య సదుపాయాలతో అప్‌గ్రేడ్ చేస్తున్నామని చెప్పారు. నూతనంగా విధుల్లోకి చేరుతున్న నర్సింగ్ ఆఫీసర్లు సేవాభావంతో ప్రజలకు ఉత్తమ వైద్య సేవలు అందించాలని పిలుపునిచ్చారు. ఈ కార్యక్రమంలో పలువురు ప్రజాప్రతినిధులు, ఉన్నతాధికారులు పాల్గొన్నారు.