ఉమ్మడి మహబూబ్‌నగర్ ప్రజాప్రతినిధులతో సీఎం రేవంత్ రెడ్డి ముఖాముఖి భేటీ!

19, May 2026 Achampet 176 Views

నియోజకవర్గ సమస్యల పరిష్కారమే లక్ష్యం.. ఎంసీఆర్హెచ్ఆర్డీలో ప్రత్యేక క్యాంప్ కార్యాలయం.

హైదరాబాద్: ఉమ్మడి మహబూబ్ నగర్ (పాలమూరు) జిల్లా పరిధిలోని ప్రజా సమస్యలను నేరుగా తెలుసుకుని, త్వరితగతిన పరిష్కరించడమే లక్ష్యంగా గౌరవ రాష్ట్ర ముఖ్యమంత్రి రేవంత్ రెడ్డి ఒక ప్రత్యేక ముఖాముఖి సమావేశాన్ని నిర్వహించారు. మంగళవారం నాడు హైదరాబాద్‌లోని ఎంసీఆర్హెచ్ఆర్డీ (MCRHRD) లో ఏర్పాటు చేసిన ప్రత్యేక క్యాంప్ కార్యాలయంలో ఉమ్మడి జిల్లాకు చెందిన మంత్రులు, ఎమ్మెల్యేలు, ఎమ్మెల్సీలతో సీఎం రేవంత్ రెడ్డి సుదీర్ఘంగా భేటీ అయ్యారు.

ముఖ్యమంత్రిగా బాధ్యతలు చేపట్టిన తర్వాత జిల్లాల వారీగా ప్రజాప్రతినిధులతో ముఖాముఖి సమావేశాలు నిర్వహించే సరికొత్త విధానానికి ఆయన ఇక్కడి నుంచే శ్రీకారం చుట్టారు. ఈ సమావేశంలో ఉమ్మడి పాలమూరు జిల్లాలోని అన్ని నియోజకవర్గాలకు సంబంధించిన పెండింగ్ సమస్యలు, అభివృద్ధి పనులు మరియు ప్రజా వినతులను సీఎం నేరుగా స్వీకరించారు.

ఈ సందర్భంగా ముఖ్యమంత్రి మాట్లాడుతూ.. పాలమూరు-రంగారెడ్డి ఎత్తిపోతల పథకం (PRLIS) తో పాటు ఉమ్మడి జిల్లాలోని అన్ని సాగునీటి ప్రాజెక్టుల భూసేకరణ పనులను యుద్ధప్రాతిపదికన పూర్తి చేయాలని అధికారులను ఆదేశించారు. భూసేకరణకు సంబంధించిన పరిహారం చెల్లింపుల్లో ఎలాంటి ఆలస్యం లేకుండా నిధులు విడుదల చేస్తామని, పెండింగ్ బిల్లులను కూడా తక్షణమే క్లియర్ చేయడానికి ప్రభుత్వం సిద్ధంగా ఉందని స్పష్టం చేశారు. నియోజకవర్గాల వారీగా ప్రజలు ఎదుర్కొంటున్న స్థానిక సమస్యలను నేరుగా అడిగి తెలుసుకున్న సీఎం, వాటి పరిష్కారానికి నిధుల కొరత రానివ్వబోమని ప్రజాప్రతినిధులకు హామీ ఇచ్చారు. ఈ సమావేశంలో మంత్రులు జూపల్లి కృష్ణారావు, శీనన్న (వాకిటి శ్రీహరి), ప్రభుత్వ విప్ యెన్నం శ్రీనివాస్ రెడ్డితో పాటు జిల్లాకు చెందిన పలువురు ఎమ్మెల్యేలు, ఉన్నతాధికారులు పాల్గొన్నారు.