హర్ ఘర్ తిరంగాను విజయవంతం చేయాలి: బిజెపి నాగర్‌కర్నూల్ జిల్లా పదాధికారుల సమావేశం

05, Aug 2026 Achampet 176 Views

'హర్ ఘర్ తిరంగ'ను విజయవంతం చేయాలి: బిజెపి నాగర్‌కర్నూల్ జిల్లా పదాధికారుల సమావేశంలో నాయకుల పిలుపు

నాగర్‌కర్నూల్: జిల్లా బిజెపి కార్యాలయంలో జిల్లా అధ్యక్షులు వేముల నరేందర్ రావు అధ్యక్షతన నాగర్‌కర్నూల్ జిల్లా బిజెపి పదాధికారుల సమావేశం నిర్వహించబడింది.

ఈ సమావేశానికి బిజెపి రాష్ట్ర ప్రధాన కార్యదర్శి ఎన్. గౌతం రావు, 'హర్ ఘర్ తిరంగ' రాష్ట్ర కో-కన్వీనర్ కట్ట సుధాకర్ రెడ్డి ముఖ్య అతిథులుగా హాజరై పార్టీ శ్రేణులకు దిశానిర్దేశం చేశారు. సమావేశంలో బిజెపి రాష్ట్ర కార్యవర్గ సభ్యులు, అచ్చంపేట మాజీ ఎమ్మెల్యే గువ్వల బాలరాజు, రాష్ట్ర అధికార ప్రతినిధి సోలంకి శ్రీనివాస్, జిల్లా ఇంచార్జి రాజు, జిల్లా ప్రధాన కార్యదర్శులు నాగేందర్ గౌడ్, శ్రీధర్ రెడ్డి, నరసింహలతో పాటు వివిధ మోర్చాల రాష్ట్ర, జిల్లా నాయకులు, మండల అధ్యక్షులు పాల్గొన్నారు.

ఈ సందర్భంగా గౌతం రావు, కట్ట సుధాకర్ రెడ్డి మాట్లాడుతూ.. ఆగస్టు 15న నిర్వహించే 'హర్ ఘర్ తిరంగ' కార్యక్రమంలో భాగంగా ప్రతి ఒక్కరి ఇంటిపై జాతీయ పతాకాన్ని ఆవిష్కరించాలని పిలుపునిచ్చారు. అలాగే ప్రత్యేక ఓటర్ల జాబితా సవరణ కార్యక్రమంలో భాగంగా బిజెపి పోలింగ్ బూత్ స్థాయి కార్యకర్తలు (BLA-2) సంబంధిత బిఎల్ఓ (BLO)లతో సమన్వయం చేసుకుంటూ ఓటర్ల జాబితా నమోదు ప్రక్రియలో పాల్గొనాలని విజ్ఞప్తి చేశారు. పార్టీలోని అన్ని మోర్చాలు కలిసికట్టుగా ప్రజా సమస్యలపై నిరంతరం పోరాటాలు చేయాలని స్పష్టం చేశారు. అనంతరం నాగర్‌కర్నూల్ జిల్లా వ్యాప్తంగా నూతనంగా నియమితులైన వివిధ మోర్చాల అధ్యక్షులను సీనియర్ నాయకులు సన్మానించారు.