అచ్చంపేటలో రైస్ మిల్లు వ్యర్థాల కల్లోలం.. పంటపొలాలు, పశువులు నాశనం!

22, Apr 2026 Achampet 176 Views

అచ్చంపేటలో రైస్ మిల్లు యజమాన్యం ఆగడాలు.. పొలాలు విషతుల్యం, పశువులు అనారోగ్యం!

అచ్చంపేట: అచ్చంపేట పట్టణ పరిధిలోని పులిజాల రోడ్డులో ఉన్న శ్రీ లక్ష్మీనరసింహ ఇండస్ట్రీస్ (బాయిలర్ రైస్ మిల్లు) నుండి వెలువడుతున్న వ్యర్థాలు స్థానిక రైతులకు శాపంగా మారాయి. మిల్లు యజమాన్యం బాధ్యతారాహిత్యంతో వ్యవసాయ పొలాలు నాశనమవ్వడమే కాకుండా, పశువులు అనారోగ్యం పాలవుతున్నాయని రైతులు ఆవేదన వ్యక్తం చేస్తున్నారు.

విషపూరితమైన వ్యర్థ జలాలు: రైస్ మిల్లు నుండి వస్తున్న కలుషిత నీటిని నేరుగా పొలాల్లోకి వదులుతుండటంతో భూమి విషతుల్యమవుతోంది. చుట్టుపక్కల మేత మేయడానికి వెళ్లే పశువులు, మేకలు ఈ వ్యర్థపు నీటిని తాగి తీవ్ర అనారోగ్యానికి గురవుతున్నాయి. మిల్లు యాజమాన్యానికి ఎన్నిసార్లు మొరపెట్టుకున్నా పట్టించుకోవడం లేదని రైతులు మండిపడుతున్నారు.

పంటలపై వైరస్ ప్రభావం: బాయిలింగ్ ప్రక్రియలో వచ్చే నల్లటి పొగ మరియు వ్యర్థాలు పంటలపై పడటంతో పంటలు వైరస్ బారిన పడి ఎండిపోతున్నాయి. దీనికి తోడు మిల్లులో పనిచేసే సిబ్బంది పొలాల్లోనే మలవిసర్జన చేస్తూ పొలాలను అపరిశుభ్రం చేస్తున్నారని రైతులు ఆగ్రహం వ్యక్తం చేస్తున్నారు. కలుషిత నీరు భూమిలోకి ఇంకితే తమ బోర్ బావులు కూడా పాడైపోతాయని, భవిష్యత్తులో సాగునీరు కూడా విషమవుతుందని రైతులు ఆందోళన చెందుతున్నారు.

అధికారులు స్పందించాలి: రైతుల కష్టాన్ని దోచుకుంటూ, పర్యావరణాన్ని నాశనం చేస్తున్న శ్రీ లక్ష్మీనరసింహ ఇండస్ట్రీస్ బాయిలర్ మిల్లుపై కాలుష్య నియంత్రణ మండలి మరియు స్థానిక అధికారులు తక్షణమే చర్యలు తీసుకోవాలని రైతులు కోరుతున్నారు. లేనిపక్షంలో పెద్ద ఎత్తున ఆందోళన చేపడతామని హెచ్చరించారు.