అచ్చంపేటలో రేషన్ బియ్యం అక్రమ రవాణా రట్టు.. బొలెరో సీజ్ | Nagarkurnool

09, Aug 2026 Achampet 176 Views

అచ్చంపేటలో రేషన్ బియ్యం అక్రమ రవాణా రట్టు: 15 క్వింటాళ్ల బియ్యంతో పాటు బొలెరో పట్టివేత

అచ్చంపేట (నాగర్ కర్నూలు): నాగర్ కర్నూలు జిల్లా అచ్చంపేట పట్టణ శివారులో పోలీసులు నిర్వహించిన తనిఖీల్లో అక్రమంగా తరలిస్తున్న రేషన్ బియ్యం భారీగా పట్టుబడింది. అచ్చంపేట పోలీసులు తనిఖీలు చేపడుతుండగా అనుమానాస్పదంగా కనిపించిన బొలెరో వాహనాన్ని (TS 31 TA 2726) ఆపి తనిఖీ చేయగా, అందులో 32 బ్యాగుల్లో నింపిన 15 క్వింటాళ్ల ఉచిత రేషన్ బియ్యం ఉన్నట్లు అధికారులు గుర్తించారు.

సమాచారం అందుకున్న ఎన్ఫోర్స్మెంట్ డీటీ (DT) హేమ్లా నాయక్ సంఘటనా స్థలానికి చేరుకుని ఆయన సమక్షంలో పంచనామా నిర్వహించారు. స్వాధీనం చేసుకున్న 15 క్వింటాళ్ల బియ్యాన్ని స్థానిక ఎంఎల్ఎస్ (MLS) పాయింట్ గోదాంకు తరలించారు. ఈ అక్రమ రవాణాకు పాల్పడుతున్న బొలెరో వాహనాన్ని సీజ్ చేసి, డ్రైవర్ కం ఓనర్ తిక్కల శ్రీకాంత్‌పై కేసు నమోదు చేసినట్లు పోలీసులు తెలిపారు.

గతంలోనూ ఇదే వాహనంపై కేసు! కాగా, పట్టుబడిన ఈ బొలెరో వాహనంపై ఏడాది క్రితం కూడా రేషన్ బియ్యం అక్రమ రవాణాకు సంబంధించి కేసు నమోదైనట్లు అధికారులు వెల్లడించారు. పదే పదే అదే వాహనంలో రేషన్ బియ్యాన్ని అక్రమంగా తరలిస్తుండటంపై అధికారులు తీవ్ర ఆగ్రహం వ్యక్తం చేస్తున్నారు.

అచ్చంపేట ప్రాంతంలో నిరంతరం కొనసాగుతున్న రేషన్ బియ్యం అక్రమ దందాపై స్థానికుల నుంచి తీవ్ర విమర్శలు వ్యక్తమవుతున్నాయి. కేవలం వాహనాల డ్రైవర్లపైనే కాకుండా, ఈ దందా వెనుక ఉన్న అసలు సూత్రధారులు, నిర్వాహకులపై కఠిన చర్యలు తీసుకోవాలని, పేదలకు అందాల్సిన రేషన్ బియ్యం పక్కదారి పట్టకుండా కఠినంగా వ్యవహరించాలని ప్రజలు డిమాండ్ చేస్తున్నారు.